Stjörnuhiminninn

Til að átta sig á næturhimninum og færslu stjörnumerkjanna má hugsa sér hann sem eins konar kúlu umhverfis jörðina. Þegar við virðum fyrir okkur stjörnumerkin á vetrarnóttu er það svipað og að vera undir hvolfþaki í stórri dómkirkju og skoða myndir af fólki úr sögum Biblíunnar. Helsti munurinn er sá að hugmyndirnar að stjörnumerkjunum koma úr öðrum áttum og svo er aðeins svalara undir stjörnubjörtum himni hér á Íslandi en í kirkjubyggingum Mið- og Suður-Evrópu.