Vísindaþátturinn í Útvarpi Sögu

Rannveig Magnúsdóttir, doktorsnemi í líffræði við Háskóla Íslands og Oxfordháskóla í Bretlandi, sagði frá rannsóknum sínum á minknum og starfi sínu í Ástralíu. Einnig var komið inn á eyðingu regnskóga.

Trausti Jónsson, veðurfræðingur við Veðurstofu Íslands, leit til okkar í spjall. Kuldaköst og veður á 18. og 19. öld komu við sögu.

Björn Berg og Sævar Helgi ræddu saman um eldvirkni í sólkerfinu og hvernig hún er frábrugðin eldvirkni á jörðinni.

Björn Berg og Martin Ingi Sigurðsson ræddu um íslenskar rannsóknir á hjarta- og lungnaskurðlækningum.

Erpur Eyvindarson og Björn Berg ræddu um efahyggju og mikilvægi hennar.

Snæbjörn Guðmundsson, doktorsnemi í jarðfræði við Háskóla Íslands, fræddi hlustendur um bergfræði og rannsóknir sínar á bergfræði Hofsjökuls.

Sigrún Hreinsdóttir, dósent í jarðeðlisfræði við Jarðvísindastofnun Háskólans, sagði frá niðurstöðum rannsókna á eldgosunum á Fimmvörðuhálsi og í Eyjafjallajökli í fyrra. Einnig var komið inn á jarðskjálfta í Krýsuvík og stóra skjálftann í Japan.

Andri Guðmundsson og Gísli Kristjánsson eru að þróa og kynna nýjar og spennandi kennsluaðferðir í forritun í framhaldsskólum og sögðu okkur frá þeim.

Árdís Elíasdóttir, stjarneðlisfræðingur við DARK Cosmology Center í Kaupmannahöfn, spjallaði um rannsóknir sínar á þyngdarlinsum og hulduefni en líka hulduorku. Einnig var lítillega rætt um óðaþenslu og Miklahvell.

Pétur Henry Petersen, líffræðingur við Háskóla Íslands, sagði okkur frá rannsóknum sínum í taugalíffræði, fjármögnun vísindarannsókna. Einnig var fjallað um glórulausa þingsályktunartillögu um erfðabreyttar lífverur.

Magnús Jóhannsson, prófessor í eiturefna- og lyfjafræði við Háskóla Íslands, sagði okkur frá rannsóknum sínum og rannsóknum á Herbalife, C-vítamíni og sólhatti svo dæmi séu nefnd.

Ágúst Kvaran, prófessor í efnafræði við Háskóla Íslands, ræddi um ár efnafræðinnar 2011, litríka flugelda og efnafræði daglegu lífi.

Martin Ingi Sigurðsson fræddi hlustendur um óhefðbundnar vísindarannsóknir sem greint er frá í jólahefti British Medical Journal ár hvert..

Tunglmyrkvi 21. desember, loftsteinadrífan geminítar og líf sem þrífst á arseniki voru umfjöllunarefni síðasta Vísindaþáttar ársins 2010.

Þáttastjórnendur fóru yfir nýjar uppgötvanir í stjarnvísindum og spjölluðu um það sem sjá má á himninum.

Eini fastagestur þáttarins, Martin Ingi Sigurðsson, ræddi við Björn Berg um raðgreiningu mannsins og erfðafræði.

9. nóvember afmælisdagur stjörnufræðingsins Carl Sagan. Við minntumst hans í þættinum og lékum nokkra vel valda hljóðbúta.

Ólafur G. Sæmundsson næringarfræðingur ræddi við okkur um næringarfræði, heilbrigt og skynsamt mataræði og gangslausar töfralausnir sem verið er að selja fólki.

Snæbjörn Pálsson líffræðingur við Háskóla Íslands fræddi okkur um kynæxlun og kynlausa æxlun og líffræðilega fjölbreytni.

Viðar Guðmundsson, prófessor í eðlisfræði við HÍ, sagði okkur frá Nóbelsverðlaununum í eðlisfræði 2010 sem veitt voru fyrir uppgötvun á grafíni og eðlisfræðirannsóknum á Íslandi.

Guðlaugur Jóhannesson stjarneðlisfræðingur fjallaði um Fermi gervitunglið og kortlagningu Vetrarbrautarinnar með því.

Steindór J. Erlingsson vísindasagnfræðingur kynnti bókina Arfleið Darwins og sagði okkur frá landnámi þróunarkenningarinnar á Íslandi.

Aðalheiður Jónsdóttir, verkefnisstjóri hjá Rannsóknarmiðstöð Íslands, leit til okkar í spjall um Vísindavökuna 2010. Við ræddum svo um Júpíter á himninum þessa dagana.

Í fyrsta þætti vetrarins ræddum við um nýjan Stjörnufræðivef og fengum Ottó Elíasson, nema í eðlisfræði við Háskóla Íslands og eins af umsjónarmönnum vefsins, til að fræða okkur um heimsfræði.

Hvað eru til margar tegundir af skordýrum á Íslandi? Hvers vegna óttumst við svo geitunga? Þetta eru meðal þeirra spurninga sem við spurðum Erling Ólafsson skordýrafræðing við Náttúrufræðistofnun Íslands að í stórskemmtilegu spjalli um skordýr.

Martin Ingi Sigurðsson, doktorsnemi í erfðafræði, leit til okkar í spjall um afrek Craigs Venter og samstarfsfólks hans sem tókst að smíða erfðamengi og koma því fyrir í bakteríu sem svo náði að fjölga sér. Er þetta í fyrsta sinn sem það tekst.

Ágúst Kvaran, prófessor í eðlisefnafræði við Háskóla Íslands, fór í gegnum dag í lífi Ragnars Reykáss og skoðaði þá efnafræði sem á vegi hans varð.