Gula höndin

17. janúar 2014

Hér sjást leifar sprengistjörnu sem líta út eins og hönd. Í miðju þokunnar er tifstjarna; lítil, þétt leif stjörnunnar sem sprakk. Hún snýst sjö sinnum um sjálfa sig á sekúndu og sendir um leið frá sér vinda út í efnið í kring. Þetta efni verkar við sterkt segulsviðið sem veldur því að skýið verður glóandi heitt og gefur frá sér röntgengeislun. Tifstjarnan, sem kallast PSR B1509-58 eða B1509, sést ekki á myndinni, til þess er hún of lítil, en hún er nálægt ljósa blettinum.

Myndin var sett saman úr mælingum NuSTAR gervitungls NASA, sem mælir háorku-röntgengeislun (blátt), og mælingum Chandra röntgengeimsjónaukans sem mælir orkuminni röntgengeisla (grænt og rautt). Fyrir nokkrum árum birtist mynd frá Chandra af sömu hönd, sem þá var bláa höndin.

Mynd: NASA/JPL-Caltech/McGill