Aqua (geimfar)
-
Aqua gervitunglið á braut um jörðina. Mynd: NASA
Agua (EOS PM-1) er fjölþjóðlegt gervitungl á vegum NASA á braut um jörðina sem rannsakar úrkomu, uppgufun og hringrás vatns á jörðinni. Gervitunglið er hluti af Earth Observing System, fjarkönnunarkerfi NASA, en á undan því kom Terra gervitunglið (skotið á loft 1999) og Aura gervitunglið á eftir (skotið á loft árið 2004).
| Skotið á loft: | 4. maí 2002 |
| Eldflaug: |
Delta II |
| Massi: |
2.850 kg |
| Tegund: |
Brautarfar |
| Hnöttur: |
Jörðin |
| Geimferðastofnun: | NASA |
| Heimasíða: |
aqua.nasa.gov |
Gervitunglið er nefnt eftir latneska orðinu yfir vatn. Því var skotið á loft frá Vandenberg herstöðinni þann 4. maí árið 2002 með Delta II eldflaug. Gervitunglið er um 2.850 kg að þyngd en 4,81 m x 16,7 x 8,04 m að stærð.
Mælitæki
Um borð eru sex mælitæki til rannsókna á vatni á yfirborði jarðar og í lofthjúpnum:
-
AMSR-E — Advance Microwave Scanning Radiometer-EOS — mælir eiginleika skýja og yfirborðshitastig sjávar, vindhraða við yfirborð jarðar, orkuútgeislun, yfirborðsvatn, ís og snjó.
-
MODIS — Moderate Resolution Imaging Spectroradiometer — mælir einnig eiginleika skýja og orkuútgeislun, smáar agnir í lofthjúpnum, breytingar á landnotkun, skógarelda og eldfjöll. Samskonar mælitæki er einnig um borð í Terra.
-
AMSU-A — Advanced Microwave Sounding Unit — mælir hita- og rakastig í lofthjúpnum.
-
AIRS — Atmospheric Infrared Sounder — mælir hita- og rakastig í lofthjúpnum og yfirborðshita á landi og sjó.
-
HSB — Humidity Sounder for Brazil — mælir rakastig í lofthjúpnum.
-
CERES — Clouds and the Earth's Radiant Energy System -— mælir orkuútgeislun.