Risaskel úr gasi og stjörnum könnuð
21. nóvember 2011
-
LH 72 er risaskel úr gasi og stjörnum í Stóra Magellansskýinu.
Í einu stærsta stjörnumyndunarsvæði sem vitað er um í Stóra Magellansskýinu, lítilli fylgivetrarbraut okkar vetrarbrautar, eru bjartir og ungir stjörnuhópar sem kallast OB stjörnufélög. Hubblessjónauki NASA og ESA hefur tekið glæsilega mynd af einu þeirra, LH 72, en í því eru nokkrar hámassastjörnur og ungar stjörnur sem enn eru umluktar þéttu vetnisgasi.
Stjörnumyndunin í Stóra Magellansskýinu á sér að stórum hluta stað í risavöxnum gasskeljum. Þær eru taldar myndast vegna sterkra sólvinda og sprengistjarna sem ryðja burt efni umhverfist stjörnurnar svo úr verða vindblásnar skeljar. Gasið sem blæs burt kólnar á endanum og leysist upp í smærri ský við útjaðar skeljarinnar, byrjar að falla saman og mynda nýjar stjörnur.
Stærsta gasskelin í LH 72 er nefnd LMC4. Hún er um 6.000 ljósár í þvermál og sú stærsta sem vitað er um í okkar næsta nágrenni. Rannsóknir á stjörnuhópum sem eru umluktir gasskýjum, eins og LH 72, er góð leið til að rannsaka myndun og þróun risagasskelja.
Þessi mynd var tekin með Wide Field Planetary Camera 2 á Hubblessjónaukanum í gegnum fimm mismunandi síur á útfjólubláa, sýnilega og innrauða sviðinu. Sjónsviðið spannar um 1,8 x 1,8 bogamínútu af himninum.
Um fyrirbærið
- Nafn: LH 72
- Tegund: Gasskel
- Stjörnumerki: Paradísarfuglinn
- Fjarlægð: 160.000 ljósár
Ummæli