Stóra Magellanskýið

Stóra Magellanskýið er óregluleg vetrarbraut sem fylgir Vetrarbrautarinni okkar. Hún er í um 160.000 ljósára fjarlægð frá jörðinni og er því þriðja nálægasta vetrarbrautin við okkur en aðeins dvergsporvalan í Bogmanninum og dvergvetrarbrautin í Stórahundi eru nálægari. Stóra Magellanskýið inniheldur um 10 milljarða sólmassa af efni og er um 14.000 ljósár í þvermál. Vetrarbrautin er hin fjórða stærsta í Grenndarhópnum á eftir Andrómeduþokunni, Vetrarbrautinni okkar og Þríhyrningsþokunni.

Stóra Magellanskýið er oft skilgreint sem óregluleg bjálkaþyrilþoka enda hefur hún áberandi bjálkaform í miðjunni. Það bendir til þess að hún hafi áður verið bjálkaþyrilþoka sem flóðkraftar Vetrarbrautarinnar og Litla Magellanskýsins hafi aflagað.

Stóra Magellanskýið sést með berum augum himinhvolfinu, fjarri allri ljósmengun, á suðurhveli jarðar. Skýið er á mörkum stjörnumerkjanna Borðsins og Sverðfisksins.