Dagbók stjörnufræðikennara – Kennsluvika 6 – haust 2013

Um dagbókina

Hér er sagt frá einni kennsluviku í stjörnufræði við Menntaskólann í Reykjavík veturinn 2013-2014.

• Dagbókin í heild (allur veturinn)

Tími í tölvustofu: Undirbúningur fyrir verkefni um stjörnuskoðun

Ég hafði eina kennslustund í tölvustofunni til þess að nemendur gætu undirbúið heimaverkefni um stjörnuskoðun sem á að skila seint í nóvember.

• Stjörnuskoðunarverkefni haustið 2013

Verkefnið skiptist í fjóra þætti:

1) Fara með einhvern í stjörnuskoðun (sem er ekki í stjörnufræði hjá mér í vetur :-) – nemandinn ákveður hvaða fyrirbæri hann sýnir út frá Stjörnukorti mánaðarins og því sem sést á himninum (tungl, norðurljós, vetrarbrautarslæðan, gervitungl... o.s.frv.).

2) Skoða stjörnurnar sem mynda Sumarþríhyrninginn

3) Skoða Karlsvagninn í Stórabirni og Pólstjörnuna í Litlabirni.

4) VALFRJÁLST: Taka þátt í Stóru alþjóðlegu stjörnutalningunni (Great World Wide Star Count) 25. október - 8. nóvember.

• Glærukynning um stjörnutalningu og ljósmengun

Sýndi nemendum sjónauka og fór í „stjörnuskoðun“ utanhúss

Ég mætti með annan af sjónaukunum mínum og sýndi nemendum hvernig spegilsjónauki virkar. Eftir þetta fórum við út og skoðuðum tunglið og klukkuna á Dómkirkjunni. Nemendum fannst mjög athyglisvert að myndin var á hvolfi í augnglerinu (sem er alþekkt í spegilsjónaukum). Það atriði skiptir hins vegar ekki miklu máli þegar horft er á fyrirbæri á næturhimninum.

Örfyrirlestrar um stjörnumerkin

Nokkrir nemendur fluttu örfyrirlestra um stjörnumerki sem var sagt frá í umfjöllun um kennsluviku 3.