Mynd vikunnar

Fyrirsagnalisti

Vetrarbrautin á suðurhveli

Vetrarbrautin á suðurhveli

27. mars

Vetrarbrautin okkar er meira áberandi á suðurhveli en norðurhveli. Helgast það af því að þar er miðjan betur sjáanleg og minna ryk sem byrgir sýn á stjörnuskarann. Þessa mynd tók Babak Tafreshi af himninum yfir Very Large Telescope ESO á Paranalfjalli í Chile, einum besta stað heims til að rannsaka og skoða næturhiminninn.

Mynd: ESO/B. Tafreshi ( twanight.org)

Sverðþokan í Óríon í innrauðu ljósi

Innrauð Sverðþoka

20. mars

Sverðþokan í Óríon (M42) er ein allra glæsilegasta geimþoka sem hægt er að skoða í gegnum litla stjörnusjónauka frá Íslandi. Hubble geimsjónauki NASA og ESA tók nýverið nýja mynd af henni í sýnilegu og nær-innrauðu ljósi en með því er hægt að skyggnast inn í þokuna á svæði sem annars eru ógegnsæ. Með myndinni voru stjörnufræðingar að leita að brúnum dvergum og reikistjörnum á flandri. Að auki fannst stjarna sem er að þjóta úr þokunni á 200.000 km hraða á klukkustund.

Mynd: NASA, ESA/Hubble

Pan, tungl Satúrnusar

Furðutunglið Pan

13. mars

Hér sést Pan, eitt örsmárra tungla Satúrnusar, á mynd sem Cassini geimfar NASA tók 7. mars 2017 úr tæplega 25.000 km hæð. Aldrei áður hafa smáatriði sést betur á þessu sérkennilega tungli sem minnir um margt á fljúgandi furðuhlut. Pan er aðeins 14 km á breidd og hringsólar um Satúrnus í Encke-bilinu í hringunum.

Mynd: NASA/JPL-Caltech/Space Science Institute

Westerlund 1

Híbýli risastjörnu

6. mars

Hér sést stjörnuþyrpingin Westerlund 1 sem er í um 15.000 ljósára fjarlægð frá Jörðinni. Í henni er ein stærsta stjörnum sem fundist hefur, kölluð Westerlund 1-26. Hún er rauður ofurrisi, um 1500 sinnum breiðari en sólin okkar og næði því út fyrir braut Júpíters, væri hún í miðju sólkerfisins okkar. Þyrpingin er ung, aðeins um 3 milljóna ára gömul.

Mynd: ESA/Hubble & NASA

UGC 12591

Blönduð vetrarbraut

27. febrúar

Hubble geimsjónauki NASA og ESA tók þessa mynd af vetrarbrautinni UGC 12591. Hún er óvenjuleg blanda linsulaga vetrarbrautar og þyrilvetrarbrautar í um 400 milljón ljósára fjarlægð. UGC 12591 er gríðarlega massamikil eða fjórfalt efnismeiri en Vetrarbrautin okkar. Þess utan snýst hún miklu hraðar en við eða á 1,8 milljón km hraða á klukkustund!

Mynd: ESA/Hubble & NASA

Dymbilþokan, Messier 27

Dymbilþokan

20. febrúar

Allar stjörnur deyja á endanum. Sumar springa en flestar deyja hægt og rólega með því að varpa frá sér ystu efnislögum sínum út í geiminn. Þannig fer fyrir sólinni okkar og þannig fór fyrir fyrrum stjörnunni sem hér sést. Þetta er Dymbilþokan eða Messier 27 í stjörnumerkinu Litlarefi. Hún er hringþoka, leifar stjörnu.

Mynd: Sævar Helgi Bragason

Suðurpóll Júpíters

Juno sér suðurpól Júpíters

13. febrúar

Hinn 2. febrúar 2017 var Juno geimfar NASA í 102.100 km hæð yfir suðurpól Júpíters og tók þá þessa glæsilegu mynd. Á henni sjást einstök smáatriði í stormasömum og hrollköldum lofthjúpnum við suðurpól Júpíters. Stjörnuáhugamaðurinn Roman Tkachenko setti myndina saman úr gögnum frá JunoCam myndavél geimfarsins.

Mynd: NASA/JPL-Caltech/SwRI/MSSS/Roman Tkachenko

Smáatriði í B-hring Satúrnusar

B-hringur Satúrnusar

6. febrúar

Undanfarna mánuði hefur Cassini geimfar NASA komist nær hringum Satúrnusar en áður og náð mögnuðum myndum af þeim. Hér sést lítill hluti af B-hringnum, tekin úr 51.000 km hæð hinn 18. desember 2016. Ótrúleg smáatriði koma í ljós sem sýna vel hversu fínir hringar Satúrnusar eru. Þeir eru myndaðir af örþunnum þráðum úr ís- og rykögnum en inn á milli eru örlitlar geilar. Fínu, ljósu deplarnir á myndinni eru af völdum geimgeisla.

Mynd: NASA/JPL-Caltech/Space Science Institute

Tunglið og Jörðin frá GOES-16

GOES-16 lítur til tunglsins

Í nóvember 2016 var GOES-16 gervitungli NASA og NOAA skotið á loft frá Canaveralhöfða í Flórída. Gervitunglið vaktar Jörðina úr ríflega 37.000 km hæð og fylgist aðallega með veðri. Stöku sinnum læðist tunglið inn á myndir þess eins og á þessari sem tekin var 15. janúar 2016. Tunglið er rauðleitara en í raun og veru vegna þess að myndavélar gervitunglsins eru næmar fyrir innrauðu ljósi.

Mynd: NOAA/NASA

Síða 1 af 2